Кыргызстандын Ишкерлер делегациясы Дубайдын Соода палатасында БАЭ валютасында операцияларды жүргүзүүнү талкуулашты. Бул тууралуу КР Соода-өнөр жай палатасы билдирди.
Ошондой эле, тараптар коммерциялык банктардын акча которуулар, корреспонденттик эсептерди ачуу маселелерин карашты. Туристтик тармактагы кызматташтыктын келечегине өзгөчө көңүл бурулду. Дубай соода-өнөр жай палатасы Кыргызстанга турларга суроо-талап көбөйгөндүгүнө байланыштуу Кыргызстандагы ишенимдүү туристтик компаниялардын тизмесин сурады. Жолугушууда белгиленгендей, туризм соода-экономикалык кызматташтыкты өнүктүрүүгө да өбөлгө түзөт, анткени өлкөнүн потенциалын көрүүгө мүмкүнчүлүк берет.
Кыргыз делегациясынан КР Соода-өнөр жай палатасынын башчысы Темир Сариев жана транспорттук-логистикалык компаниялардын, банк секторунун, эт азыктарын өндүрүүчүлөрдүн, Кыргызстанда соода-логистикалык борборлорду курган компаниялардын, ошондой эле мыйзамдуу ишке орноштуруу менен алектенген компаниялардын өкүлдөрү катышты.
