Кыргызстанда пахтаны кайра иштетүүчү кыргыз-өзбек биргелешкен ишканасы ачылат. Бул тууралуу «Кабар» агенттигине Өзбек-Кыргыз өнүктүрүү фондунун төрагасы Азиз Аалиев билдирди.
Аалиев учурда пахтаны өстүрүү жана андан текстиль буюмдарын өндүрүүнү караган кластердик өндүрүш долбоору даярдалып жатканын айтат.
«Бул Кыргызстандын текстиль тармагын өнүктүрүүгө жаңы дем берет. Бизде пахта бар, бирок аны кайра иштетүү жок. Биздин дыйкандар түшүмүн арзан баада сатууга аргасыз болууда», — деди ал.
Ишкананын курулушу Кыргыз-Өзбек өнүктүрүү фонду тарабынан каржыланары күтүлүүдө.
Ошондой эле ал азыр фонддо жалпы суммасы 8 млн доллардан ашык каражатка төрт долбоор бар экенин жана 20дан ашык ар кандай долбоорлорго кредиттик линияларды даярдалып жатканын, алар ар кандай этапта экенин билдирди.
«Алардын жалпы баасы 100 млн доллардан ашат. Даяр болгондон кийин каржылоону баштайбыз», — деп кошумчалады Аалиев.
