Кыргызстандын президенти Садыр Жапаров 18-декабрда жеке бизнес учагы менен Катарга футбол боюнча дүйнө чемпионатынын финалын көрүү үчүн барды. Бишкектен Дохага учуунун баасы 25-30 миң долларды түзөт.
Катарга жеке учак менен учуп кеткенин Kaktus.media сайты жазып, Qatar News Agency порталынан Жапаровдун Дохага келген сүрөттөрүн тапкан. Сүрөттөрдүн биринде жеке учак тартылган.
Президенттин басма сөз кызматы Жапаровдун «жумушчу сапары» тууралуу билдирүүсүндө Жапаровдун Дохага келгени тартылган сүрөттөрдү берип, бирок учактын сүрөтүн көрсөткөн эмес.
Kaktus.media сайтынын маалыматына таянсак, Кыргызстандан Катарга учкан Embraer Legacy 600 жеке бизнес-учагы www.flightradar24.com порталына кирип калган. Бишкектен Дохага жана кайра кайтып келүү канча турары белгисиз, бирок бизнес-джеттердин онлайн-калькуляторлору боюнча бул каттам боюнча учууга орточо эсеп менен 50-60 миң доллар керектелет.
Президенттин маалымат кызматы Жапаров Катардын Эмири шейх Тамим бен Хамад Аль Танинин чакыруусу менен барганын, андан тышкары, ал Түркиянын президенти Режеп Тайип Эрдоган менен жолугушканын, өлкө лидерлери саясий, соода-экономикалык жана маданий-гуманитардык чөйрөдөгү эки жана көп тараптуу кыргыз-түрк өз ара аракеттенүүсүнүн актуалдуу маселелери жөнүндө сүйлөшүшкөнүн билдирди.
Белгилей кетсек, акыркы бир жыл ичинде бул Садыр Жапаровдун жеке учагы менен бешинчи жолу учушу. Буга чейин КРнын башчысы бизнес учак менен Глазго, Пекин, Нью-Йорк жана Астанага барып келген.
