Бишкектин коомдук транспортунда дифференцияланган тариф киргизгени жатышат: накталай акча менен кымбатыраак, карта же тиркеме менен төлөө арзаныраак болмокчу. Бул тууралуу жол-транспорттук инфраструктурасын өнүктүрүү департаментинин директору Максат Нусувалиев билдирди.
Нусувалиевдин айтымында, мындай чара элди электрондук төлөмгө эртерээк өткөрүү үчүн киргизилет. Мисалы, жол кире акысы накталай түрдө 15 сом, накталай эмес түрдө 11 сом болот. Мындай тариф шаардык кеңеш уруксат берсе киргизилет.
«Биз муну ыңгайсыздык жаратыш үчүн эмес, эл бюджеттик акчаны консолидациялоого жардам бериши үчүн киргизгени жатабыз. Баары эле билет, кээ бир айдоочулар жумуштан кийин кирешенин кайсы бир бөлүгүн чөнтөгүнө салып кетишет. Ал эми биз, муниципалдык ишкана катары, каражатты өз эсебибизге чогултушубуз керек», — деди департаменттин директору.
Эскерте кетсек, чиновник ошондой эле Бишкек үч жылдан бери жол кире акысын электрондук түрдө төлөөгө өтө албай жатканын айткан эле.
