Түштүк Кореялык ишкерлер Нарын облусунда 5 мегаватт кубаттуулуктагы кичи ГЭС куруу мүмкүнчүлүгүн карап чыгышат. Бул тууралуу президенттин Нарын облусундагы ыйгарым укуктуу өкүлү Алтынбек Эргешовдун Түштүк Кореяга болгон иш сапарында айтылды.
Берилген маалыматка таянсак, иш сапардын алкагында Нарын облусу менен Түштүк Кореянын Канвон-до Индже районунун ортосунда достук мамиле түзүлүп, өз ара кызматташуу, тажрыйба алмашуу жана айыл чарба долбоорлорун алдыга жылдыруу боюнча меморандумга кол коюлган.
«Учурда ГЭСти курууга ылайыктуу жерди тандоо жана даярдоо иштери башталды. Мындан тышкары, сулуну кайра иштетүүчү ишканаларды куруу жана жашылча өстүрүүчү күнөсканаларды куруу маселелери талкууланды», — деп айтылат маалыматта.
Ошондой эле Эргешовдун Түштүк Кореяга болгон иш сапарынын алкагында ар кыл тармактагы адистер ортосунда тажрыйба алмашуу боюнча макулдашуулар түзүлүп, ноябрь айынын аягына чейин Нарын облусуна Түштүк Кореядан адистердин келиши күтүлүүдө.
