Швейцария өкмөтү карыларды жана өзгөчө муктаждыктары бар адамдарды колдоо үчүн 473 миң доллар (азыркы курс боюнча 39 млн сомдон ашык) бөлөт. Бул тууралуу дипломатиялык өкүлчүлүктүн маалыматында айтылат.
Элчиликтин берген маалыматына ылайык, 20-апрелде Швейцариянын Кыргызстандагы элчиси Оливье Бангертер БУУнун Бүткүл дүйнөлүк азык-түлүк программасынын КРгы директору Кодзиро Накай менен бирге Чүй облусундагы эки социалдык стационардык мекемеде болду.
Бангертердин айтымында, Швейцария 1200гө жакын адамдын (анын ичинде карылар жана өзгөчө муктаждыктары бар) жашоо шарттарын жакшыртуу үчүн 473 миң доллар бөлүп жатат.
Бул долбоор Бүткүл дүйнөлүк азык-түлүк программасы (БДП) тарабынан Эмгек жана социалдык өнүгүү министрлиги менен тыгыз кызматташтыкта ишке ашырылат.
