Монополияга каршы жөнгө салуу мамлекеттик агенттигинин башчысы республиканын нефтетрейдерлери менен жолугушуу өткөрүп, анда күйүүчү-майлоочу майлардын (КММ) баасы, запастар, көйгөйлөр жана башка маселелерди талкуулашты. Бул тууралуу аталган мекеменин басма сөз кызматы билдирди.
Нефтетрейдерлердин айтымында, КММ жеткирүү боюнча келишимдер алмашуу курсу жогору болуп турганда түзүлгөн жана бул келишимдер боюнча белгилүү көлөмдөр дагы деле болсо Кыргызстанга келүүдө.
Буга байланыштуу нефтетрейдерлерге төмөнкүдөй сунуштар берилди:
- республиканын аймактарын КММ менен толуктоо үчүн чакан жана дүң сатууну калыбына келтирүү маселесин кароо
- жогорку баада сатылып алынган КММдин калган көлөмүн сатуу аяктаганга чейин социалдык маанидеги товарларга – АИ-92 үлгүсүндөгү бензинге жана дизелдик отунга баанын өсүшүнө жол бербөө
- бул калдыктар сатылгандан кийин, келечекте мунай продуктыларынын баасына түздөн-түз таасирин тийгизген доллардын курсунун төмөндөшүн эске алуу менен, сатылып жаткан күйүүчү-майлоочу майлардын баасын төмөндөтүү
- мунай продуктыларынын тартыштыгын жана ашыкча суроо-талапты түзүүгө жол бербөө жана рынокту толтуруу үчүн КММдин зарыл запастары менен камсыздоо
- республиканын аймактарында АЗС тармагын кеңейтүү мүмкүнчүлүгүн кароо
- май куюучу жайларда унаага КММ куюлбай калуусуна көзөмөлдү күчөтүү жана керектөөчүлөрдүн укуктарынын бузулушуна жол бербөө
- рынокто кырдаал өзгөргөн учурда ыкчам жана алдын алуу чараларын көрүү үчүн кайтарым байланышта болуу.
Ошондой эле маалыматта бүгүнкү күндө ККМдин жаңыдан түшкөн көлөмүн эске алуу менен республикада үч айлык дизель майы жана бензиндин бир айлык запасы бар экени айтылат.
