Бүгүн, 29-марттагы Жогорку Кеңештин жыйынында «КРнын Улуттук банкынын пайдасын которуу маселелери жөнүндөгү» мыйзам долбоору биринчи окууда каралганын ЖКнын маалымат кызматы билдирет.
Жыйында баяндама жасаган Финансы министринин орун басары Илияз Иманбетов мыйзам долбоору Улуттук банктын пайдасынан республикалык бюджетке түшүүчү чегерүүлөрдүн өлчөмүн 2021-2022-жылдарга 70%дан 90%га чейин көбөйтүү жолу менен республикалык бюджеттин киреше бөлүгүн көтөрүү максатында иштелип чыкканын маалымдады.
Талкуу учурунда депутат Өмүрбек Бакиров Улуттук банк кирешелерин кайсы булактардан алып жатканын сурады.
Улуттук банктын төрагасы Кубанычбек Бөкөнтаев ички жана тышкы каражат жүгүртүүлөрдөн киреше алынаарын айтып, 2021-жылы 9.2 млрд сом пайда алынганын белгиледи. Анын 10%ы гана калтырылса, 920 млн сом болоорун кошумчалады.
«Ал резервге которулуп, чыгашаларга жумшалат. Учурда Улуттук банктын резервинде 8 млрд сом бар», – деди Бөкөнтаев.
Ал эми депутат Эльдар Сулайманов мындай өзгөртүү Улуттук банкка кандай таасир берээрин сурады.
Өз кезегинде Улуттук банктын төрагасы буга чейинки 70/30%дык бөлүштүрүү оптималдуу болгонун жүйө келтирип, бирок республикалык бюджетти толтурууга багытталган жаңы эрежеге ылайык иш алып барууга даяр экендиктерин билдирди.
Белгилей кетсек, буга чейин регулятор кирешесинин 70%ын гана республикалык бюджетке берчү.
