Ошто ата мекендик өндүрүштү колдогон жаш ишкерлердин конференциясы өттү. Бул тууралуу жергиликтүү T-media.kg маалымат порталы билдирди.
Маалыматка таянсак, Ошто JashtarCamp платформасынын демилгеси менен айыл чарба жана агроөнөр жай тармагына кызыккан жаштардын башын бириктирген иш чара өткөн. Ага Ош, Жалал-Абад жана Баткен облустарынан бул тармакка кызыккан 16-28 жаштагы ишкерлер келген.
Конференцияда ар тармактагы спикерлер, эксперттер, айыл чарба тармагындагы ишканалардын өкүлдөрү жана ийгиликтүү бизнесмендер катышуучулар менен өз билимдерин жана тажрыйбасын бөлүшкөн.
Конференцияга катышкан ийгиликтүү ишкерлердин бири Адыл Гапаров кадимки чегирткеден экологиялык азык жасаганын аталган порталга айтып берген. Алгач колунда 30 гана чегиртке болсо, азыр аны көбөйтүп ун жана куурулган азык жасап келет. Иш чарада ал мындай ишкерликке тартылгысы келген жаштарга кеңешин берди.
