Россиянын президенти кабыл алган экономикалык чечимдерге ылайык, эквиваленттеги 10 миң АКШ долларынан жогору суммада накталай чет элдик валюталарды жана (же) чет элдик валютадагы инструменттерди РФтен алып чыгууга тыюу салынды. Бул тууралуу КРнын Мамлекеттик Бажы кызматынын маалымат кызматы билдирди.
Аталган тыюу салуулар РФтен накталай чет элдик валюталарды алып чыгууга (анын ичинде мурда алып келинген), анын ичинде ЕАЭБге мүчө-мамлекеттерге жайылтылат жана юридикалык жана жеке жактарга карата алардын статусуна карабастан колдонулат (резиленттер жана резидент эместер).
Белгиленген тыюу салууларды аткарууну камсыз кылуу максатында, Россия ФБКсы жана Россия ФКК Чек ара кызматы менен биргеликте ЕАЭБге мүчө-мамлекеттердин аймактарына чектеш Россиянын мамлекеттик чек арасы аркылуу өткөрмө пункттарында контролдоо уюштурулган.
«10 миң АКШ долларынан ашкан суммадагы накталай чет өлкө валютасын жана (же) чет өлкө валютасындагы инструменттерди аныктоо чек ара көзөмөлүнүн жерлеринде бул каражаттардын суммасына жеке жактарга байкоо жүргүзүү жана суракка алуу жолу менен жүргүзүлөт», – деп айтылат билдирүүдө.
Алып чыгууга тыюу салынган акча каражаттары жана акча инструменттери табылган учурда алар алынбайт жана жоопкерчилик чаралары колдонулбайт. Ошол эле учурда, Россия Федерациясында валютаны калтыруунун жеткиликтүү ыкмалары жеке жактарга өздөрүнүн тандоосу жана каалоосу боюнча чараларды көрүүсү үчүн түшүндүрүлөт.
