10 миң чет элдик студент экономикага 150 млн доллар алып келет. Бул тууралуу Бишкекте «Перезагрузка – 2022» деген аталыштагы Антикризистик форумда Экономика министринин мурдагы орун басары, ишкер Эльдар Абакиров айтты.
Анын айтымында, Баткен, Талас, Нарын, Кара-Колго медфакультеттерди ачып, ар бир шаарга 3 миңден пакистандык, индус студенттерди алып келиш керек.
«Анткени 10 миң студент 150 млн доллар алып келет экономикага. Бир студент окуусун төлөп, тамак-аш жеп, батирде туруп, жылына 15 миң доллар таштайт. Эгерде 10 миң айтишник чакыра алсак, алардын орточо айлыгы 1.5 миң доллар, бул 180 миң долларга жетет. Ушундай жолдор менен мигранттардан келе турган акчанын ордун жабышыбыз керек», – дейт ал.
Форумда Абакиров бул жылдагы кризисте мигранттардан 1-1.5 млрд долларга азыраак акча келээрин, анын ордун жабуунун жолдорун издөө керектигин айтты.
«2008-жылдагы экономикалык кризисте мигранттардан келген акча 400 млн долларга азайган экен. 2014-жылдагы кризисте 500 млн доллардан азыраак, ковид кризисинде болсо, 600-700 млн доллардан төмөн көлөмдө келиптир, учурдагы кризисте болсо миллиарддан ашат деген ойдомун. Ал акчанын ордун кайдан табабыз, эмне менен алмаштырабыз, маселе ошондо», – деди ал.
