Бизнес-акыйкатчынын орун басары Сергей Пономарев жаңы Салык кодекси боюнча 20дан ашуун жазуу жүзүндөгү сунуштарды жөнөтүшкөнүн, бирок эч кандай жооп болбогонун айтты. Бул тууралуу ал «Бизнес жаңы Салык кодексинин шарттарында: тирүү калуу!» деп аталган тегерек столдо билдирди.
Пономарев мамлекетти эффективдүү башкаруу үчүн салык төлөөчүлөр өздөрүн ыңгайлуу сезиши керектигин, экономиканы өнүктүрүү үчүн кайтарым байланышты камсыздоо маанилүү экенин баса белгиледи.
«Биз мурда парламентке келгенде бизден «Бизнес, кандай ойлойсуңар?» деп сурашчу. Ооба, биз да ката кетиришибиз мүмкүн, бизнес, эксперттер, мамлекеттик органдар ката кетириши мүмкүн, бирок баарын талкуулай билүү маанилүү. Экономика министрлигинин салык саясаты башкармалыгы бардык сунуштарга жооп бергенин айтканын укканда абдан таң калдым», — деди ал.
Белгилей кетсек, тегерек стол Economist.kg басылмасы тарабынан уюштурулган болчу.
