Коомдук тамактануу ишканаларына тиешелүү бирдиктүү салыктын ставкасы жалпы рынокко таасирин тийгизиши мүмкүн. Бул тууралуу«ХоРеКа клуб Ассоциациясынын» директору Гүлзат Райымбекова «Бизнес жаңы Салык кодексинин шарттарында: тирүү калуу!» деп аталган тегерек столдо билдирди.
Анын айтымында, Кыргызстанда жалпысынан 15 миңден ашык коомдук тамактануу ишканалары катталган, бул орточо эсеп боюнча 200 миң жумушчу орунун түзөт.
«Жумуш менен камсыз болгондордун саны боюнча биз өндүрүш кызматкерлеринен көп деле кем калбайбыз», – деди ал.
Рестораторлор жана мейманканачылар Ассоциациясынын президенти Евгений Тян коомдук тамактануу ишканалары Кыргызстандагы негизги иш берүүчүлөрдүн катарына кирерин белгиледи. «Биз жеткирүүчүлөргө, туризм секторуна мультипликативдик таасир этебиз – бул бүтүндөй экосистеманы түзөт», – деди ал.
