Кечээ, 26-январда Ош шаарынын мэриясынын 2021-жылга карата жыйынтыгын чыгарган биргелешкен коллегиялык отуруму өттү. Ага Министерлер кабинетинин төрагасы Акылбек Жапаров, Ош шаарынын мэри Алмаз Мамбетов, Президенттин Ош облусундагы өкүлү Зиядин Жамалдинов жана мекеме-ишканалардын жетекчилери катышкан..
Жыйындын жүрүшүндө калаа башчы Ош шаарынын социалдык-экономикалык өнүгүүсүнүн 2021-жылдагы жыйынтыгы жана 2022-жылга карата милдеттер жөнүндө маалымат берди.
Өндүрүш жана тейлөө
- Өнөр жай ишканалары тарабынан 2021-жылы 5 млрд 654 млн сомдук (2020-жылы 4 млрд 493.4 млн. сом болгон) продукция өндүрүлгөн
- 1 млрд 449 млн сомдук айыл чарба продукциясы өндүрүлүп, физикалык көлөмдүн индекси 101.9%ды түздү
- Курулуштун дүң продукциясынын жалпы көлөмү 2021-жылы 8 млрд 534 млн сомду түзүп, 2020-жылга караганда 360 млн сомго көбөйгөн
- Шаардын чарба жүргүзүүчү субъектилери тарабынан көрсөтүлгөн рыноктук тейлөөлөрдүн көлөмү 2021-жылы 72.3 млрд сомду (2020-ж. 56 млрд. сом) түздү
- 2021-жылы жалпы 1742 жумуш орундары түзүлгөн.
Бюджет жана курулуш
- Жергиликтүү бюджеттин киреше бөлүгү (атайын каражаттарды кошпогондо) 102.9%га аткарылып, такталган пландан 36 млн сомго көп аткарылды . 2020-жылдын тийиштүү мезгилине салыштырганда 252 млн сомго көп жыйналып, өсүү темпи 123.9% түзгөн.
- 2021-жылга жергиликтүү бюджеттен капиталдык курулуш тармагына 202 млн сом акча каражаты каралган
- Шаар бюджетинин эсебинен 3 бала бакча, 1 ФАП курулуп, пайдаланууга берилди
- Республикалык бюджеттин эсебинен 87.6 млн сом акча каражаты бөлүнүп, Жапалак аймактык айылдык башкармалыгында узундугу 7200 метр суу түтүктөрүн тартуу, сыйымдуулугу 500 метр кубдук 2 суу кампа, 2 насос орнотуу иштери жүргүзүлүүдө
- Көп жылдан бери республикалык бюджеттен каржыланып, курулушу токтоп калган 4 мектепке акча каражаты бөлүнүп, азыркы учурда кайрадан курулуш иштери жандандырылды
- Жолдорду оңдоп-түзөө үчүн жергиликтүү бюджеттин эсебинен 103.2 млн сом акча каражаты бөлүнүп, жыл ичинде 8.5 км жол жаңыдан асфальтталган.
- Ипотекалык фонддун эсебинен 3 көп кабаттуу үйлөрдүн (215-батир) курулуштары башталып, Достук кичи районунда 90 батирлүү үйдүн курулушу бүткөрүлсө, Курманжан-Датка көчөсүндөгү 80 батирлүү үйдүн курулушу жакынкы күндөрдө аяктайт. Ал эми Көкүм-Бий көчөсүндөгү 45 батирлүү үйдүн курулушу жүргүзүлүп жатат. Быйылкы жылы өнүгүү программанын алкагында дагы 3 көп кабаттуу үйлөрдүн курулушу башталмакчы.
Донорлор жана мамлекет көрсөткөн жардам
- 2022-жылы Дүйнөлүк банктын каржылоосу менен коомчулукту өнүктүрүү жана инвестициялоо Агентство (АРИС) аркылуу Ош облусунун жана Ош шаарынын регионалдык экономикалык өнүктүрүү боюнча долбоорду ишке ашыруу пландалган. Долбоордун алкагында туризм багытына 6 млн доллар бөлүнөрү пландаштырылып, шаардагы туристтик обьектилерди реконструкциялоо, Ак-Буура дарыясынын жээгин жашылдандыруу жана көрктөндүрүү, Алишер Навои эс алуу багынын бир бөлүгүнө эс алуучу жай куруу, Ош шаарынын борбордук аянтына фонтан куруу боюнча кичи долбоорлор даярдалып жатат.
- Андан сырткары Сулайман-Тоо музей комплексин реконструкциялоого 4 млн доллар КРнын маданият, маалымат, спорт жана жаштар саясаты министрлиги аркылуу бөлүнүп жатат.
