Бүгүн, 27-январда Инвестициялар агенттигинин (KADI) жетекчиси Нурадил Баясов менен Азербайжандан келген эксперттик топтун жолугушуусу болуп өттү. Бул тууралуу аталган мекеменин басма сөз кызматы билдирди.
Маалыматка караганда, Азербайжандын Экономика министринин орун басары Ниязи Сафаров инвестиция, бизнести өнүктүрүү, энергетика жана айыл чарба тармагындагы мамлекеттик органдардын жетекчилеринен турган эксперттик топту жетектеп келди.
Баясов КР эки тараптуу байланыштарды тереңдетүүгө жана өнүктүрүүгө өз ара ишенимге жана өз ара кызыкчылыкка негизделген Азербайжан менен ар тараптуу мамилелерди өнүктүрүүгө чоң маани берерин белгиледи.
Белгиленгендей, тараптар диалогду активдештирүү жана мындан аркы соода-экономикалык жана инвестициялык кызматташууга көмөктөшүү боюнча макулдашышты, ошондой эле инвестициялык долбоорлорду биргелешип ишке ашыруунун жана биргелешкен ишканаларды түзүүнүн өзгөчө ролун белгилешти.
Өндүрүштүк потенциал жана өнүктүрүү тажрыйбасы менен таанышуу үчүн азербайжандык делегация Бишкек ЭЭАга барат, ошондой эле мамлекеттик органдар жана ата мекендик бизнес түзүмдөрү менен бир катар жолугушууларды өткөрөт. Эки тараптуу ишкердик байланыштарды өнүктүрүү үчүн 28-январда КРнын ишкер чөйрөлөрү менен бизнес жолугушуу өткөрүү пландаштырылууда, анын алкагында пич-сессия жана B2B жолугушуулары өткөрүлөөрүн агенттиктен билдиришти.
