Быйыл «Камбар-Ата-1» ГЭСинин курулушу башталат. Бул тууралуу кечээ, 25-январда Кыргызстанда жана коңшулаш Казакстан менен Өзбекстанда электр энергиясы масштабдуу өчүрүлгөндөн кийин Министрлер кабинетинин төрагасы Акылбек Жапаров билдирди.
Анын айтымында, курулуштун биринчи этабын ишке ашыруу үчүн 418 млн доллар керектелет, дээрлик 18.8 млн доллар капиталдык салымдарга – инфраструктураны курууга жана курулушту баштоону даярдоого каралган. Жапаров Финансы министрлиги акчаны эчак эле тапканын билдирди.
Кабинеттин башчысы курулуш республикалык бюджеттин жана инвестициянын эсебинен пландалып жатканын кошумчалады. Казакстан менен Өзбекстан да долбоорго катышууга даяр экендиктерин билдиришкен. Азыр энергетиктердин деңгээлинде сүйлөшүүлөр жүрүп жатат, андан соң аларга экономисттер, финансисттер кошулат. Акыркы чечимди мамлекет башчылары кабыл алат.
