Министрлер кабинети унаа ээлеринен акы төлөнүүчү караңгылатуу (тонировка) үчүн 50 миң сом алууну көздөөдө. Бул тууралуу депутат Дастан Бекешев өзүнүн Facebook баракчасында билдирди.
Эскерте кетсек, мындай демилгени Экономика министрлиги республикалык бюджетке салыктык эмес кирешелерди көбөйтүү максатында көтөрүп чыккан болчу.
Министрликтин айтымында, акы төлөнүүчү уруксатты киргизүү унаа ээлерине мыйзамдуу түрдө унаанын айнектерин караңгылатуу мүмкүнчүлүгүн берет. Башкармалык ошондой эле мисал катары өткөн жылдын 11 айында жол кайгуул кызматы айнекти караңгылатуу боюнча 2559 протокол түзгөнүн айтты.
Эгерде бул демилге жактырылса, тонировкалоого акы төлөнүүчү уруксаттын баасы Министрлер кабинети тарабынан аныкталмак. Бекешевдин билдиргенине караганда, бул баа аныкталды жана ал 50 миң сом болот.
