Кызматтык унаалар көп болгондуктан, 2022-жылдын аягына чейин мамлекеттик мекемелерди электромобилдерге өткөрүү керек. Канчалык эртерээк болсо, экологияга ошончолук жакшы. Бул тууралуу кечээ, 19-январда Кытайдан келген электромобилдерди көрсөтүү учурунда Экономика жана коммерция министринин орун басары Жарасул Абдураимов билдиргенин министрликтин маалымат кызматы билдирди.
Ал белгилегендей, электр транспорту республика үчүн актуалдуу маселе катары каралат, анткени Кыргызстандын борбору бир нече жылдан бери эң булганган шаарлардын тизмесинде турат, ал эми экологиялык жагымсыз абалдын себептеринин бири автоунаалардан чыккан түтүндөр.
«Жыл сайын күйүүчү май сатып алууга көп каражат жумшалат. Абалды жакшыртуу үчүн электромобилдерди ишке киргизүү программасы иштелип чыккан. Ошондой эле электр кубаттоочу станциялар универсалдуу болуп, бардык унаага ылайыктуу болушу керек», – деди ал.
