«Чакан ГЭС» ААКсы (мамлекеттик үлүшү 100%) Талас районундагы Киров суу сактагычында Бала-Саруу кичи ГЭСинин курулушуна жабдууларды сатып алууга тендер жарыялады. Бул тууралуу ишкананын басма сөз кызматы билдирди.
Мамлекеттик сатып алуулар порталынын маалыматы боюнча, акционердик коом жабдууларды сатып алууга 889.4 млн сом сарптоого даяр.
«Чакан ГЭС» ААКсы төмөнкү жабдууларды сатып алууну көздөөдө:
- көмөкчү жабдуулар жана системалары бар гидротурбиналык орнотуулар
- жардамчы жабдуулар жана системалар менен гидрогенератор
- жабдуулар менен башкаруунун автоматташтырылган системасы
- басым түтүгүнүн бош разряддары үчүн кошумча жабдуу.
Белгилей кетсек, «Бала-Саруу» ГЭСинин курулуш долбоору жалпы кубаттуулугу 25 мегаватты түзөт, үч генераторлуу, орточо 92 млн кВт/с өлчөмүндөгү электр энергиясын иштеп чыгарууга жөндөмдүү болот.
- Орус-кыргыз өнүктүрүү фонду (ОКӨФ) «Бала-Саруу» ГЭСин курууга 22.9 млн доллар берет.
Эске салсак, үстүбүздөгү жылдын 29-августунда президент Садыр Жапаров Талас облусуна жумушчу сапарынын алкагында Киров суу сактагычында «Бала-Саруу» жаңы чакан гидроэлектр станциясын курууга капсула салган.
Жаңы гидроэлектр станциясынын курулушун Энергетика министрлигинин жана «Улуттук холдинг компаниясы» ААКнын көмөгү менен «Чакан ГЭС» ААК иш жүзүнө ашырмакчы. Жол картасына ылайык, долбоорду 2022-жылдын декабрь айында жыйынтыктоо пландаштырылууда.
