Президент Садыр Жапаров өзүнүн Facebook баракчасында 2021-жылдын бюджетинин аткарылышы боюнча маалымат берип, өлкөнүн жалпы бюджети 281.3 млрд сом деңгээлинде бекитилгенин билдирди.
Анын айтымында, республикалык бюджеттин тартыштыгынын баштапкы өлчөмү 8.5 млрд сом деңгээлинде болжолдонуп, 2021-жылдын башында салык жана бажы төлөмдөрүн чогултуу бекитилген пландан артта калганы байкалган. Ал эми жылдын бюджетинин аткарылышы боюнча Салык кызматы салык кирешелери боюнча планды 7.9 млрд сомго ашыра аткарып, бюджетке 104.2 млрд сом түшүргөн.
Бажы кызматы акыркы эки айда пландан артта калуусун 3.2 млрд сомдон 1.6 млрд сомго чейин кыскартууга жетишип, бюджетке 46.8 млрд сом түшүргөн. Жалпысынан, жылдын жыйынтыгы боюнча мамлекеттик бюджеттин салык кирешелери толугу менен аткарылып, 151 млрд сомду түзгөн.
Президенттин берген маалыматына ылайык:
- мамлекеттик бюджеттин салыктык эмес кирешелери толугу менен аткарылып, 44.7 млрд сомду түзгөн
- салыктык эмес кирешелердин өсүшү бекитилген пландагы 31.3 млрд сомго салыштырмалуу 13 млрд сомдон ашык болгон
- консолидацияланган бюджеттин ресурстук бөлүгүнүн иш жүзүндө аткарылышы 311 млрд сомду түзүп, бекитилген планга салыштырмалуу 30 млрд сомго өскөн.
Президент жарандардын социалдык абалын, эпидемиологиялык абалды жакшыртуу, ошондой эле өлкөнүн азык-түлүк жана энергетикалык коопсуздугун камсыз кылуу үчүн бюджеттик каражаттын эсебинен кошумча зарыл иш-чараларды аткарууга мүмкүндүк бергенин билдирет.
- медицина кызматкерлеринин эмгек акысын 50% жогорулатууга 1.8 млрд сом бөлүндү
- маданият кызматкерлеринин эмгек акысын жогорулатууга 2 млрд сом бөлүндү
- кызыл зонада иштеген медицина кызматкерлерине компенсация төлөөгө 1.9 млрд сомдон ашык каражат бөлүндү (COVID-19)
- 1.5 млрд сомго COVID-19га каршы вакциналар сатылып алынды
- азык-түлүк коопсуздугун камсыз кылууга, тактап айтканда, буудайды, данды сатып алууга жана азык-түлүк товарларынын камылгасын толуктоого 1.9 млрд сом бөлүндү
- кыштан көйгөйсүз өтүү максатында энергетика тармагына жаратылыш газын, электр энергиясын, мазутту сатып алууга жана электр энергиясын импорттоого кошумча 3.4 млрд сом каралды
- ден соолугунун мүмкүнчүлүктөрү чектелүү балдарга социалдык жөлөкпулдарды, камкорчусунан ажыраган балдарга социалдык жөлөкпулдарды жана пенсияларды 50% көбөйтүүгө болжол менен 0.6 млрд сом жумшалды.
- 2022-жылдын 1-январынан тартып жөлөкпулдар 100%га көбөйдү.
Ал эми ВИЧке же СПИДге чалдыккан энелерден төрөлгөн балдарга, ден соолугунун мүмкүнчүлүктөрү чектелүү балдарга жана ден соолугунун мүмкүнчүлүктөрү чектелүү адамдарга берилүүчү жөлөкпул 2021-жылдын 1-октябрынан тартып 4000 сомдон 6000 сомго чейин көтөрүлгөн. 2022-жылдын 1-январынан тарта бул жөлөкпулдардын өлчөмү 8 миң сомду түзөт.
Жапаров билдирүүсүнүн аягында ресурстук бөлүк жана берилген бардык милдеттенмелер аткарылып, 2021-жылга бюджет 5.6 млрд сом деңгээлиндеги запас менен аткарылганын белгиледи.
