Америкалык Forbes журналы казакстандык төрт миллиардердин байлыгы өлкөдөгү массалык баш-аламандыктардан улам 3 млрд долларга кыскарганын билдирди.
4-январдан бери Kaspi.kz финтех-компаниясынын директорлор кеңешинин башчысы Вячеслав Кимдин байлыгы компаниянын акцияларынын 30%га төмөндөшүнөн улам 1.4 млрд долларга (4.2 млрд долларга чейин) азайды.
Ошол эле Kaspi.kz сайтынын башкы директору Михаил Ломтадзенин байлыгы да 1.4 млрд долларга (3.8 млрд долларга чейин) кыскарган.
Динара Кулибаева (Нурсултан Назарбаевдин ортончу кызы) менен анын күйөөсү Тимур Кулибаевдин байлыгы 200 млн долларга (ар бири 3 млрд долларга чейин) азайган. Алар ээлик кылган «Халык Банктын» акциясынын баасы 16%га арзандаганы (Казакстандагы эң ири банк) белгилүү болду.
Казакстанда 2-январда массалык нааразылык акциялары башталып, көп узабай ал массалык башаламандыкка чейин жеткен. Учурда өлкөдөгү бизнеске 200 млн доллардан ашык суммадагы зыян келтирилгени жана анын дээрлик бардыгы Алма-Ата шаарына туура келгени айтылууда.
