Орус-кыргыз өнүктүрүү фонду (ОКӨФ) Ош шаарындагы тигүү фабрикасынын курулушун каржылайт. Бул тууралуу аталган уюмдун басма сөз кызматы билдирди.
Белгилүү болгондой, ОКӨФ менен «Кыргыз Текстиль Лтд» ЖЧКнын ортосунда 4.3 млн долларлык кредиттик келишимге 15-октябрда кол коюлган.
Өндүрүштүн көлөмү жылына 7 миллиондон ашык кийимди түзөт. Фабрика ата мекендик чийки заттардан текстиль продукциясын өндүрүүнүн толук циклин ишке ашыра турган ири масштабдагы текстиль кластеринин биринчи этабы болмокчу.
Берилген каражатка заманбап тигүү үчүн япон жана европалык жабдуулар сатылып алынат. Бул текстиль кластеринин инфраструктурасынын көбү буга чейин эле 20 млн доллардан ашык суммага «Кыргыз Текстиль Лтд» ишканасынын жеке каражаттарынын эсебинен курулган.
Фонддун төрагасы Артем Новиковдун айтымында, долбоордун эсебинен 900дөн ашык жумушчу оруну түзүлөт. Бул түштүк региондорунда пахта эгүүдөн баштап, даяр продукцияны экспорттоого чейин токулган жана кийим тигүүчү ири кластерди ишке ашыруунун биринчи этабы.
Долбоор Кыргызстандын экономикасына комплекстүү таасирин тийгизет, мамлекеттик бюджетке салык жана социалдык чегерүүлөр түрүндөгү төлөмдөрдү жылына 5 млн долларга чейин жогорулатат. Ошондой эле өлкөгө экспорттук кирешелердин агымын көбөйтөт, анткени продукциянын 90%ы Россияга жана ЕАЭБ өлкөлөрүнө экспорттолот.
Эскерте кетсек, бул тигүү фабрикасынын курулушу тууралуу Новиковдун түштүккө болгон биринчи сапарында айтылган болчу. Белгилей кетсек, учурда ОКӨФтүн портфелине түз каржыланган 67 долбоор жана коммерциялык банктар менен микрофинансылык уюмдар аркылуу каржыланган 2973 долбоор кирет. Берилген кредиттердин жалпы суммасы – 384 млн долларды түзөт.
