Акылбек Жапаров: «Кыргызстан казылып алынчу алтындар менен кредиттерден кутулат»

Акылбек Жапаров: «Кыргызстан казылып алынчу алтындар менен кредиттерден кутулат»

Жогорку Кеңештин депутаты, «Кумтөр» алтын кенинин ишмердүүлүгүн текшерүү боюнча түзүлгөн мамлекеттик комиссиянын төрагасы Акылбек Жапаров бүгүн 20-майда түз эфирде пресс-конференция берүүдө.

Жапаров алтын өндүрүү иштери учурунда каза болгон жарандар тууралуу айтып, алардын өлүмдөрү боюнча иш козгоо аракеттери башталаары тууралуу сөз кылды.

«Азыр өлкөбүздүн экономикалык суверенитети үчүн согуш башталды. Биз баарын ачык-айкын айтабыз. Буга чейин кенде каза болгон кыргыз жарандарынын иштери мастерлердин же бригадирдин күнөөсү деп жабыла берген. Биз азыр 2018-2020-ж.ж. жарандардын өлүмдөрү боюнча иш козгойбуз», – деди ал.

Андан сырткары, келечекте казылып алынган алтындар аркылуу Кыргызстан алган насыяларынан кутулуу пландары тууралуу да билдирди.

«Тилекке каршы, буга чейин көп өлчөмдөгү алтындарыбыз чыгып кетти. Буюрса, өндүрө турган алтындарыбыздын эсебинен 20 жылга алган кредиттерибизден кутулсак, андан ары көп карыз албай экономикабызды оңдоп кете алабыз. Биринчи этап – алтын казуу болсо, экинчи этап – бул сатуу. Экинчи этаптагы алтынды кантип сатуу боюнча механизмин иштеп чыктык», – деди Жапаров.

Ошону менен катар, алтын кенин иштетүүдө баары бир тобокелчиликтер бар экенин да белгиледи.

«Албетте, өндүрүш иштеринде техникалык тобокелчиликтер бар, коопсуздукка эч ким кепилдик бере албайт. Бирок кыргыз жарандары учурда иштеп жатышат. Компьютердик программаларды өчүрүп кеткен канадалык менеджерлерге кылмыш ишин козгойбуз. Бул үчүн укук коргоо органдарына мүмкүнчүлүк беребиз» – деди «Кумтөр» алтын кенинин ишмердүүлүгүн текшерүү боюнча түзүлгөн мамлекеттик комиссиянын төрагасы Акылбек Жапаров.

Поделиться в соцсетях:

НБ КР
USD 81.05
EUR 80.70
RUB 1.33
Моссовет
USD 82.90
EUR 83.60
RUB 1.37

Конвертер валют